AF268: 81v

Edirneye dārü n‑naṣrdur dėyü ad vėrmişlerdür quṭbü l‑ʿārifīn güzīde‑i āl‑i ḫatmü n‑nebī [?] yaʿnī Emīr Sulṭān Burūsādan // Edirneye Yıldurum Ḫān merḥūmı ziyārete geldükde ol kenīsā cāmiʿ‑i şerīfinde erbaʿīn çıqarmışlardur ve naql buyurdılar ki // her gėce bu maqāma yetmiş biñ ferişte ziyārete gelüb geldükde ikişer rekʿat namāz qılub andan ʿurūc ėderler dėyü // buyurdılar ve daḫı naql olınur ki naṣrānī ṭāʾifesi tekke ėdinüb kemāl‑i mertebe ʿizzet ėderlerdi ve yahūdī cemāʿati // daḫı bī‑nihāye ḥürmet ėderlerdi zīrā enbiyā‑yi ʿaẓāmdan ʿaleyhi ṣ‑ṣalāt ve s‑selām ḥażret‑i ʿĪsā bu maqāma qadem // baṣdı dėrler ḥālen Edirne içinde bir peyġamber medfūndur ve ne yėrde idügi nā‑maʿlūmdur ehl‑i tevārīḫden menqūldur // ve ḥiṣār u kenīsā içinde bir bıñar vardur cüẕām rencine nāfiʿdür zīrā ol bıñarı ol medfūn peyġamber // qazmışdur baʿżı rāvī eyidür Cevher Şāh dėrler bir pādişāh cüẕām marażına mübtelā olduqda gelüb ol bıñar // ṣuyıyla ġusl eyledükden ṣoñra ol maraż andan zāyil oldı ṣoñra ol peyġamberüñ dīnine girüb ve ol bıñarı // laṭīf maʿmūr ėtdi dördünci maqām Ḥıżrlıqdur zīrā ḥażret‑i Ḥıżr ile İlyās anda müşāhede ėtdüklerinde duʿā // ėdüb duʿāları maqbūl olurdı pes bu mevāżiʿ‑i erbaʿadan ġaflet ėtmeyeler ki duʿādan çoq kimse maqṣūda // vuṣūl bulmışdur ve daḫı tevārīḫ‑i muʿteberede mesṭūrdur ki bu Edirnenüñ qalʿesini Edrīn [?] bin Erḥam // bin İslām bin Ādem bünyād ėtmişdür dėrler ḥażret‑i Nūḥ ṭūfānından muqaddem dört‑yüz yıl binā olınmışdur // meẕkūr qalʿe‑i mücāhid‑i müslimīnden nice ṣāḥib‑şecāʿat ḫurūc ėdüb ve qalʿenüñ üstine düşüb ʿasker‑i islām‑i // seʿādet‑encām ile küffār‑i ḥāksār [!] ʿaẓīm ceng ü cidāl ve ḥarb u qıtāl olmışdur ki qalʿe‑i merqūme biñ ḫāk‑i ḫūn‑i // şühedā ile sirişt olmışdur ve niçe defʿa küffār‑i ẓalālet‑tebār cebren ḥiṣārı ehl‑i islāmdan alub // mesācid‑i islāmı medār‑i aṣnām ėtmişlerdür vuqūʿı tafṣīle muḥtācdur bi‑ḥamdi llāhi taʿālā kerd‑i dārü l‑islām // olduġı ġāzīlerüñ ocaġıdur dīn bunda şöhret buldı ḥaqq subḥāne ve taʿālā kelām‑i şerīfinde // Alif‑lām‑mīm ġulibati r‑rūmu fī adnā l‑arḍi dėyü buyurduġında murādu llāh aṣl‑i Rūm olan Edirne şehridür // iç [...] ṣadr deştdür [?] hevāsı ḥūbdur [!] zīrā şemāl ü cenūbı açuqdur hevā müteʿaffin olmaz // şarqı ve ġarbı yüksekdür ḥadīs̱‑i şerīf Ḥabīb‑i ekrem ṣallā llāhu ʿaleyhi ve‑sellemde qanġı şehrüñ ki cenūbı açuq // olmasa hevāsı müteʿaffin olmaġın anda ṭurmaq żarardur dėyü buyurmışlardur ḥālen Burūsa şehrinüñ cenūbī // cānibinde kūh‑i ruhbān ḥavāle olmaġın hevāsı ġāyet beddür ḥükemā‑yi müteqaddimīnden rivāyet olınur ki